येणे जाणे

येणे जाणे

*******

तुझे येण्याविन येणे

तुझे जाण्याविन जाणे

तुझे असणे नसणे

मनी जागवते गाणे 

काळ मिटलेली स्पप्ने

तरी हृदयी तराने 

माझे मजला कळते 

माझी नच मी उरते 

तुला डोळी साठवुन 

जाते तुझीच होवून

शब्द असतात काही 

रूप डोळीयाच्या डोही

जीव  क्षणी शांत होतो

पुन्हा विरही झुरतो

देही असुनी विदेही 

नाव प्रीतीस या नाही 

वाटे जावे हरवून

काळ्या डोहात बुडून

तुझे येणे खरे नाही 

तुझे जाणे खोटे नाही

दृश्य भास प्रकाश ही

मज कळत का नाही

माझे तुझ्यात असणे

सवे तुझ्या हे जगणे

देह शब्दांची मिळणी 

हि तो द्वैताची खेळणी 

***

भक्ती विक्रांता भेटली

राधा राणीच्या पावुली

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘