कवितेसाठी कविता: डॉ बाबासाहेब आंबेडकर यांना

शुक्रवार, ६ डिसेंबर, २०१९

******************************

होय बाबा जाणतो मी

सार्‍या तुमच्या वेदना

ज्यास्तव दिले आयुष्य

तो भारत असे उणा

महामानव म्हणती

सारी दुनिया तुम्हाला

बांधूनी भव्य पुतळे

नि विसरति तुम्हाला

स्वातंत्र आणि समता

या दोनच मुल्यांसाठी

वेचले जीवन तुम्ही

लढलात न्यायासाठी

मान्य मला इथे तरी

व्याधी जागी अजुनही

दिसे आग धुमसती

लागली दोन्हीकडेही

द्वेषाची भुते जणू की

मरत नाही कधीही

इकडून तिकडे ती

वाहतात जणू काही

ओठावरी दिसे जरी

प्रेम मैत्री खोटी काही

दोघांच्याही पोटी भिती

आहे सुप्त अजुनही

तुम्हा प्रति परी वदे

मी जीविचे गुज माझे

तुमच्याच लढ्यातून

कि जे झाले आहे माझे

माणूसकी जात माझी

धर्म माझा माणूसकी

या देशाशी या मातीशी

फक्त माझी बांधीलकी

प्रिय मजलागी आहे

प्र्त्येक माणुस इथला

उपासना असो काही

तो भारत वंशी इथला