ओंजळ
******
दत्ता किती जमवावा
सांग शब्दज्ञान ठेवा
किती कुठे भटकावे
या गावाहून त्या गावा
चित्रिची गाय जाणली
दूध लागू दे ओठाला
कंटाळलो त्रिगुणा या
गुणातीता ये भेटीला
झाले गीता भागवत
तत्वज्ञान वाचूनिया
भारावलो आनंदलो
कथा गोड ऐकुनिया
पाण्याविन कोरडा जो
काय करू त्या आडाला
ओल खोल दे भावाची
झरा लागू दे भक्तीला
कुणी पाणक्या कृपाळू
वा भेटू दे रे वाटेला
ओंजळीने शांत व्हावा
जीव हा तहानलेला
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️ .
कोणत्याही टिप्पण्या नाहीत:
टिप्पणी पोस्ट करा