पायवाट
******
हळूहळू मनात धूसर होणारी तुझी प्रतिमा आणि शब्दांना लागलेली ओहोटी
याच्यातील सरळ संबंध नाकारत नाही मी
प्रत्येक खेळाला एक शेवट असतो
प्रत्येक नाटकाला एक अंत असतो
खरंतर हारजीत सुखांत दुःखांत
याला काहीच महत्त्व नसते
पण तरीही घडतच असते हसणे रडणे,
स्मृतीच्या अनैच्छिक वावटळात
भरकटतच असते मन
तश्या येतात तुझ्या आठवणी
पण त्याची आता होत नाहीत गाणी
कदाचित ऋतूची करामत असेल ही
काळाच्या वर्षावात हरवून जातात
अनेक सुंदर पायवाटा ही
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️ .
कोणत्याही टिप्पण्‍या नाहीत:
टिप्पणी पोस्ट करा