साधन
******
तुझ्या नामाविन अन्य ते साधन मज दयाघन घडले ना ॥१
पूजन अर्चन ध्यान संकीर्तन
व्रत उद्यापन काही नाही ॥२
फुल पाने माळा झाली नाही गोळा
घडला सोहळा कुठला ना ॥३
नाही कसे म्हणू यत्न तो ही केला
खटाटोप भला जमला ना ॥४
ज्याचे बापजादे जैसे रे असती
तैसे ते मिळती वारसांना ॥५
असून दैवाचा धनी भाग्यवान
केली वण वण उगाच मी ॥६
आता मी निवांत राहतो पडून
व्याज व्याजातून मिळवतो ॥ ७
🌾🌾🌾
© डॉ.विक्रांत प्रभाकर तिकोणे
kavitesathikavita
☘☘☘☘ 🕉️
कोणत्याही टिप्पण्‍या नाहीत:
टिप्पणी पोस्ट करा