कवितेसाठी कविता: ॐ काराचा काटा

सोमवार, २७ फेब्रुवारी, २०२३

************

घोकली मी गीता दिव्य ज्ञानेश्वरी

अभंग ही उरी खोचले गा ॥१

भजला विठ्ठल नमियला दत्त

बुद्ध तथागत आदरला ॥२

किती पाठ केली संतांची कवणे

भक्तांची भजने वारे माप ॥३

बांधली वासना जाळली कामना

बांधियले मना वेळोवेळी ॥४

परी आता सारे सुटू जात आहे

मन होत आहे पाठमोरे ॥५

नाम ध्यान पाठ झाले काठोकाठ

भरुनिया माठ वाहतसे ॥ ६

गेला भक्तिभाव शून्यातील धाव

नभातला गाव गंधर्वांचा ॥७

विक्रांत ठणाणा ध्वनिविना घंटा

ॐ काराचा काटा घशामध्ये ॥८

🌾🌾🌾

कवितेसाठी कविता