कवितेसाठी कविता: खेळ

शनिवार, २५ फेब्रुवारी, २०२३

****

असा कसा खेळ खेळशी तू दत्ता

मजला कळता नच कळे ॥१

कुणा संतासवे धाडसी सांगावा

येई म्हणे गावा आपुलिया ॥२

कुणा शोधुनिया धरून हाताला

घेवून घराला जात असे ॥३

कुणा जागेवरी देऊनिया बोध

थांबवसी शोध बाहेरील ॥४

कुणा योगरुढ बसवी निश्चळे

कुणा भक्तीबळे नाचवसी ॥५

आणिक कुणाला धाडसी जगती

डोळ्यावर पट्टी बांधूनिया ॥६

कळेना कुठे तो चालतो फिरतो .

काय नि करतो कशासाठी ॥७

धावरे दयाळा सोडव ही पट्टी

पाहू देत सृष्टी तुझ्या रूपे ॥८

विक्रांत तिमिरी चाचपडतसे

खोडकर हसे थांबवी रे ॥ ९

सरू दे खेळणे उगा लांबलेले

जीवन आंबले अहंकारी ॥१०

🌾🌾🌾

कवितेसाठी कविता