कवितेसाठी कविता: पार

रविवार, २६ फेब्रुवारी, २०२३

****

नकारी नटले देवळाचे दार

भरलेला पार गंजाडानी ||१

भरली चिलीम आदान प्रदान

धुराने भरून झाड गेले ||२

चालली आरती देवापुढे पेढा

खाऊनिया वेडा खुश होय ||३

सुखाचे मागणं दुःख आक्रंदन

गेले हरवून कल्लोळात ||४

मिळे तो हसतो दुसरा रडतो

नशिबाला देतो दोष उगा ||५

मरतो आतला मरे बाहेरला

नदीच्या वाटेला गाव जातो ||६

दिसेना कोणाला कोणाची पुण्याई

पाप भरपाई करी कोण ||७

विक्रांत करतो आत मी बाहेर

जीव थाऱ्यावर नाही जरी ||८

इथला तिथला कधी म्हणवतो

घालतो काढतो माळ गळा ||९

🌾🌾🌾