कवितेसाठी कविता: आधीव्याधी

शुक्रवार, ४ नोव्हेंबर, २०२२

*********

दिल्या आधीव्याधी जरी त्या प्रभुने

प्रारब्धवशाने आल्या किंवा ॥

दवा हि प्रारब्ध पथ्य ही प्रारब्ध

भोगणे प्रारब्ध बरे होणे ॥

वेळ येता नच पथ्य कामी येते

दवा न लागते देहास या ॥

कुणाची काय ती असे वेळ इथे

ठाऊक नसते कुणालाही ॥

नियमात सारे बांधलेले जग

नियमात वाग सांगे ऋतू ॥

देह तो टाकणे आज वा उद्याला

मग ही कशाला चिंता उरी ॥

आधी व्याधी तना षडरिपू मना

चालला सामना चालू दे रे ॥

हाती आला क्षण दे रे स्मरणाला

आळवी प्रभूला पुन्हा पुन्हा॥

देह त्याचा आहे मन त्याचे आहे

निसंगत्वे राहे जगतात ॥

देवे दिली वृत्ती ज्योतही पेटती

सदोदित चित्ती आस त्याची ॥

जगतो विक्रांत जग राहटीत

पथ्य नियमात खेळे उगा ॥

🌾🌾🌾

https://kavitesathikavita.blogspot.com

☘☘☘☘☘ १