***********************
सुखात सजले क्षणात सरले
जीवन भिजले वैभवात ॥१
असून भोवती सुख ते अपार
गेला भोगणार एकाक्षणी ॥२
स्वप्न तुटले डाव मोडले
भोग राहिले उरामध्ये॥३
हे तो घडते घडतच असते
परंतु पाहते कोण इथे ॥४
अन प्रश्ना ज्या उत्तर नसते
डोके फोडते कोण तिथे ॥५
स्वप्नचि असते ज्याचे जगणे
त्याचे मरणे क्लेषाधिक ॥६
ठाऊक तुजला ठाऊक मजला
जवळ ठाकला मुक्काम तो ॥७
घडते स्मरण त्याचे दाटून
येताच घडून असे काही॥८
या मरणाचा खेळ दावला
मज निशंक केला दत्तात्रेये ॥९
जग रे विक्रांत वा मर आता
नुरला गुंता कुठेच काही ॥१०
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘..
कोणत्याही टिप्पण्‍या नाहीत:
टिप्पणी पोस्ट करा