************
कळ दाबता उठतो
कळ दाबता बसतो
आशीर्वाद ही देतो
देव खेळणे नसतो॥१
सर्वव्यापी सनातन
विश्वाचा हरेक कण
असुनिया निर्गुण
लीलाधर तो सगुण॥२
देव गाभारी बसावा
देव हृदयी धरावा
मुळी नच रे हलावा
प्राणची तो रे व्हावा॥३
देव स्वतःचं उठावा
भक्तासाठी रे धावावा
कडकडून भेटावा
द्वैत भेद हा मिटावा॥४
कळ गूढ ती आतली
कुणा क्वचित कळली
खूण खूणेनी दिसली
विद्या विक्रांता फळली॥५
डॉ. विक्रांत प्रभाकर तिकोणे
कोणत्याही टिप्पण्या नाहीत:
टिप्पणी पोस्ट करा