पुटी
****
दत्त म्हणता म्हणतादत्त स्थिरावतो चित्ता
सार्‍या हरवती वृत्ती
त्याची कणोकणी सत्ता
अहं दत्ताचे स्फुरण
ब्रह्म दत्त नाम दोन
म्हणा नभ वा गगन
राही अवघ्या व्यापून
दत्त जरी निराकार
घेई भक्तीने आकार
मन बुद्धीच्या अतीत
घेई पूजा उपचार
ऐसा दत्त जाणवा रे
सदा स्फुरणी ठेवावा
असे सदोदित जिथे
त्या त्या क्षणात पहावा
कोण पाहतो कोणाला
प्रश्न थोरला उरतो
कोहं सोहं जळुनिया
फक्त तोच तो राहतो
काय सांगावे शब्दात
वाचा वर्णाविन उगी
नाम रूपाची ही सृष्टी
नाही विक्रांता रे जगी
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘
कोणत्याही टिप्पण्‍या नाहीत:
टिप्पणी पोस्ट करा