नाही कधी

ज्याला हवे जे ते प्रिय

इथे मिळत नाही कधी

आकाशाचा रंग निळा

हाती लागत नाही कधी |

म्हटले उगाच जगू इथे

गीत घेवून ओठावर

आवडलेले सूर परंतु

का सापडत नाही कधी |

हाय जीवना स्पर्श तुझा

मखमलीचा किती मृदुल

गंध तुझा मोह फुलांचा

पण उमजत नाही कधी |

हे सहजची गीत उमलले

कोण थबकले घेता घेता

मातीमध्ये जाती पाकळ्या

हात लागले नाही कधी |

माझे असूनही माझे नाही

दैव खेळते खेळ सदा

अन झुगारून जावू पाहता

जाता येत नाही कधी |

डॉ.विक्रांत प्रभाकर तिकोणे
http://kavitesathikavita.blogspot.in