साधन
******
भजता भजता भजन हरावे स्पंदन उरावे भजनाचे ॥१
स्मरता स्मरता स्मरण नुरावे
एकटे उरावे शून्यामाजी ॥२
नाचता नाचता नर्तन ठाकावे
तद्रूपची व्हावे झंकाराशी ॥३
लिहता लिहता लिहणे थांबावे
अर्थ उमटावे कैवल्याचे ॥४
गाता गातांना रे गायन थांबावे
श्वासात उरावे सूर फक्त ॥५
ऐसिया अवघ्या कृतींचा शेवट
ईश्वरा निकट थबकावा ॥६
तर ती साधने प्रीतीची भक्तीची
देवाच्या प्राप्तीची खरोखर ॥७
अन्यथा बाजारी मिळतेच मोल
परी ते रे फोल सर्वार्थाने ॥८
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️
