कवितेसाठी कविता: कवितेसाठी कविता

मंगळवार, २० जानेवारी, २०२६

**************

इतक्या लिहल्यावर कविता

वाटते कधी पुरे झाल्या कविता

तसेही फारच कमी लोक

इथे वाचत असतात कविता

तसे तर मी लिहिल्या नाहीत

कोणी म्हटले म्हणून कविता

जरी कुणासाठी कधीतरी

मनात उमलून आल्या कविता

किती ही आंदोलने मनात

येतात रूप होऊन कविता

रूप रस गंध स्पर्शापलीकडे

हलकेच मला नेते कविता

कवी होणे खरीच भाग्याचे असते

सांगते मलाच कधी कविता

आणि पुन्हा पुन्हा गळ घालते

शब्दात त्या रुजवायला कविता

माहित नाही माझे अजून किती

देणे तुला बाकी आहे कविता

हे ऋण वाचेचे फेडतोय मी

लिहून ही कवितेसाठी कविता

तरीही अनेकदा वाटतेच मला

पुरे झाले आता लिहणे या कविता

आणि उरलेले दिवस हे आता

जगावे फक्त होवून कविता

🌾🌾🌾

https://kavitesathikavita.blogspot.com

☘☘☘☘