******
रात्रभर ओरडणारे भुंकणारे कुत्रे पहाटे पहाटे निजले आहेत
त्यांचा सीमावाद भांडणे जणू
आताच जराशी निवळली आहेत
मुन्सीपालटीत दरवर्षी टॅक्सचे
हजारो रुपये भरून वैतागलेले नागरिक
कानात कापसाचे गोळे घालून
जरा जरासे पडले आहेत
निवडून आलेले सरदार इथे
जवळपास मुळीच राहत नाहीत
त्यांच्या राजमहालात राजवाड्यात
कुठलेही आवाज घुसत नाही
नागरिक कुत्रे मारू शकत नाहीत
तेवढी हिम्मत नसते त्यांच्यात
नागरिक तोंड उघडू शकत नाहीत
कारण कुणी ऐकत नसतात
मग सकाळी कानातील गोळे काढत
तारवटलेल्या डोळ्यांनी
ते आपली बस किंवा ट्रेन पकडतात
अन ऑफिसात डुलक्या घेतात
मग कधी बॉसच्या तर कधी पब्लिकच्या
शिव्या फुकट खात राहतात
भुंकणे ऐकणे, व्यर्थ जागणे,शिव्या खाणे
अन दुर्लक्षित राहणे
जणू एक एक त्यांचा खिताब असतो
अंगवळीने पडलेला
चपलेत टोचणाऱ्या खिळ्यागत
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️ .
कोणत्याही टिप्पण्या नाहीत:
टिप्पणी पोस्ट करा