एक फेसबुक फ्रेंड

तू भेटलीस अन माझ्या

जीवनाचा पासवर्डच बदलला

अन मग पुन्हा पुन्हा लॉगीनचा

सिलसिला सुरु झाला

तुझ्या माझ्यामध्ये हॅकिंगला

कुणालाच जागा नव्हती कधी

तुझी माझी अगदी गट्टी

फायरवाल मधली होती

व्ह्यायरस मालवेअर वगैरे

तर फार लांबच्या गोष्टी होत्या

व्हॉटसप फेसबुकवरील भेटी

त्या अगदी नित्याच्या होत्या

काय काय शेअर केले मी तुला

कविता चित्रांनी वॉलच भरून टाकला

नको त्याही गोष्टी सांगून टाकल्या

हसत पण तू सावरून घेतलेस मला

पण तरीही तू कधी भेटली नाहीस

अन भेटायला ये म्हटली नाहीस

पण खरच सांगतो त्याची

गरजही मला वाटली नाही

मायावी हे जग असते सारे   

असे म्हणतात ज्ञानी सगळे

तसे तर जगणेही व्ह्र्रच्युअलच असते 

हे ही मी होते कुठेतरी वाचले

मग जी मला वाटते अन भेटते  

तू तीच नसशीलही कदाचित

अन मलाही दिसतो तसे

जाणत नसशील तूही कदाचित

पण तुझ्या माझ्या भेटण्याने   

जगणे किती वेगळे झाले

एक नवा आयाम जीवनाला

अन खोली कळण्याला देवून गेले

डॉ.विक्रांत प्रभाकर तिकोणे  

http://kavitesathikavita.blogspot.in/

ओंगळ नजर

स्त्री देहावर

रेंगाळणारी

ओंगळ नजर

वासनेचे जहर

जर उतरले

माझ्याही

डोळ्यात

तर

हे कृतांता

मज अंध कर

कायमचे

तत्क्षणीच

तू कृपेचा

होत सागर

डॉ.विक्रांत प्रभाकर तिकोणे  

http://kavitesathikavita.blogspot.in/

देव आधार

देव आधार सदाचाराचा 
चारित्र्याचा नीतीचा  
सारासार विचाराचा
देव आकार प्रेमाचा , 
सहृदयाचा मांगल्याचा, 
नि कल्याणाचा
देव अपार सामर्थ्याचा 
सुज्ञ जाणीव देणारा 
सदा साक्षी असणारा
देव नसे रे जादूगार    
दुनिया स्वर्ग करणारा 
मरती मुंगी वाचवणारा
देवत्वाची पूजा माझी 
पूजा असते आशेची  
कामना अन मानव्याची  
 अंधारावर जय मिळविणाऱ्या 
 त्या उद्याच्या सूर्याची
तो देव जर हरवला  
अर्थ न राहीन लढण्याला  
या इथल्या जगण्याला  
मनीच्या उज्वल माणुसकीला
म्हणून जपतो  
देव मी पूजितो  
अग्निसम रे जगायला

डॉ.विक्रांत प्रभाकर तिकोने
 

http://kavitesathikavita.blogspot.in/