देव्हाऱ्यात
*******
देव्हाऱ्यात किती रुप ती सगुण
ठेवली मांडुन आवडीने ॥१
लंगडा श्रीकृष्ण वाघावरी देवी
उपदेश देई दत्तात्रेय ॥ २
गोड गणपती देव पशुपती
माता सरस्वती सुंदरशी ॥ ३
गुरुदेव स्वामी ज्ञानदेव साई
कुलदेवीआई गजानन ॥ ४
खेळता रंगता भरले अंगण
भरे ना रे मन काय करू॥ ५
शेजघरातून आई बोलावते
जावे न वाटते यातून परी ॥ ६
याद देई सांज सरू आला खेळ
निजायाची वेळ निराकारी ॥ ७
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️ .
