देव्हाऱ्यात

देव्हाऱ्यात

*******

देव्हाऱ्यात किती रुप ती सगुण  

ठेवली मांडुन आवडीने ॥१

लंगडा श्रीकृष्ण वाघावरी देवी 

उपदेश देई दत्तात्रेय ॥ २

गोड गणपती देव पशुपती 

माता सरस्वती सुंदरशी ॥ ३

गुरुदेव स्वामी ज्ञानदेव साई 

कुलदेवीआई गजानन ॥ ४

खेळता रंगता भरले अंगण 

भरे ना रे मन काय करू॥ ५

शेजघरातून आई बोलावते 

जावे न वाटते यातून परी ॥ ६

याद देई सांज सरू आला खेळ 

निजायाची वेळ निराकारी ॥ ७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

माझ्या अंगणात

अंगणात

********

माझ्या देवघरी सगुण खेळणी 

ठेवली मांडूनी एक एक ॥ १

लंगडा श्रीकृष्ण वाघावरी आईं 

उपदेश देई दत्तात्रेय ॥ २

गोड गणपती देव पशुपती 

देवी सरस्वती सुंदरशी ॥३

रामकृष्ण स्वामी ज्ञानदेव साई 

नर्मदा गंगाई श्रीनाथजी ॥ ४

राम पंचायन  ठेवले मांडून 

सवे .गजानन  शेगावीचा ॥ ५

खेळता खेळता भरले अंगण

भरेना ग मन काय करू ॥ ६

घराच्या आतून माय बोलावते 

जावे न वाटते परी आत ॥ ७

याद देई सांज सरू आला खेळ 

कुशीत त्या वेळ शिरण्याची । ८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ -

नेई मज

नेई मज

******

दत्ताच्या ही आधी होता जिथे दत्त 

नेई मज तिथं गुरुनाथा ॥१

निर्गुणा नव्हता फुटला अंकुर 

आकारा आकार उमटला ॥२

कारणा कारण कळल्या वाचून 

असे अकारण सारे जिथे ॥३

तया त्या शून्याचा स्फोट होण्याआधी 

कोण कुठे होती कळो मज॥४

असेल धिंवसा मनी हा रे फुका 

जाणणे आणिका खेळ वृथा॥५

विक्रांत तटस्थ उघडून डोळा 

पोहचणे तळा घडेची ना ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘

देव तत्व

देव तत्व

*******

जैसे ज्याचे मन

तैसा भगवान 

तैसे चे दर्शन 

तया होई ॥१

राम शिव कृष्ण 

रूप ही सगुण 

कुणाला निर्गुण 

रुचतसे॥२

तर मग खरा 

देव असे कोण 

पहावा शोधून 

ज्याचा त्याने ॥

सगुणाची काया 

निर्गुण आकाश 

आवडीचा भास 

ज्याचा त्याचा ॥

चित्ती अवतरे

देव कुणा एक

होय प्रकाशक 

तोच तया 

काचेचा तो हट्ट 

कोणी करतात 

आणि धावतात 

दुजी तोडू ॥

तया या मूढांची 

मनेची ओखटी 

तम अरबडी

वेढलेली ॥

विक्रांत दत्ताचा 

पाहतो रूपाला 

जाणून तत्त्वाला 

सर्वव्यापी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘.२६२