तुझे गाणे
*****
तुझे गाणे तूच दिले तुझे गाणे तूच नेले
कुणाचे ग काय गेले
नभ सदा गर्द निळे
तुझे रूप गुण गाता
मन तुझे गाणे झाले
वाऱ्यावर हरवता
डोळा का ग पाणी आले
ओठ जुळे ओठावर
शीळ उठे रानभर
थरारते वेळू रान
व्रण कुण्या मनावर
अजूनही झिनझिन
मिरवते पान पान
ओघळून दव वेडे
जन्म टाके ओवाळून
मागते का गाणे कधी
मोबदला परतीचा
श्रुतीवर मोहरला
अगा जन्म धन्य त्याचा
विखुरले इंद्रधनु
रंग सारे उधळून
हाती कुण्या नच आले
नयनात तरंगुन
तेही तुझे गाणे होते
सप्त रंगी सुरावले
तयातून तुच मज
जणू स्वप्न रूप दिले
🌾🌾🌾
© डॉ.विक्रांत प्रभाकर तिकोणे
kavitesathikavita. ..
☘☘☘☘ 🕉️ .
कोणत्याही टिप्पण्‍या नाहीत:
टिप्पणी पोस्ट करा