कवितेसाठी कविता: मोठेपण

शनिवार, १९ ऑक्टोबर, २०२४

*******

दिलेस दातारा कैसे मोठेपण

जगणे कठीण वाटतसे ॥

आधीच होतो मी भाराने वाकला

त्यावरी ठेवला हौदा थोर ॥

डोके काढे अहं मिळता कारण

तयाला कोंडून ठेवू किती ॥

मोडूनिया पाय बांधुनिया हात

ठेविले युद्धात जैसे काही ॥

जरी सरू आली एक चकमक

नच की ठाऊक पुढे किती ॥

थकलो लढून बापा मी शरण

पांढरे निशान घेत हाती ॥

तयाकडे तुझा का रे काना डोळा

लावी वाहायला ओझे आन ॥

ठेवशील तैसा राहीन मी देवा .

परी सदा ठेवा डोई हात ॥

🌾🌾🌾

https://kavitesathikavita.blogspot.com .

☘☘☘☘ 🕉️ .