कवितेसाठी कविता: खेळ

मंगळवार, ७ नोव्हेंबर, २०२३

*****

बांधुनिया डोळा जन धावे सैरा

मायेचा पसारा कळेचिना ॥१

जरी असे कारा कळेना गबाळा

सुखाचा सोहळा समजती ॥२

जरी पदी बेडी मिरवती वेडी

साज त्या मानती आनंदाने ॥३

अवघा वेड्यांचा जमला बाजार

चाले व्यवहार अर्थशून्य ॥४

आणि कोणी तया सांगावया जाती

दगड हाणती माथ्यावर ॥५

चालला निरर्थ खेळ हा सतत

पाहतो विक्रांत अचंबित. ॥६

कळेना का दत्त हसतो गालात

मायेच्या खेळात रमवून ॥ ७

अगा बरे नाही ऐसे हे खेळणे

उगा फसवणे लाडक्यांना ॥८

🌾🌾🌾

https://kavitesathikavita.blogspot.com .

☘☘☘☘ .