हजार गाणी
**********
हजार गाणी दत्ताची
नाहीत मुळी कामाची
जर का तयात भेटीची
तळमळ नाही ॥
हजार नावे दत्ताची
जणू की बोल यंत्राची
अवघा झाला शीणची
उगा येता-जाता॥
हजार गावे दत्ताची
परिक्रमा ती व्यर्थची
जे का भटकंतीची
हौस पुरवू जाती ॥
हजार दिल्या दक्षिणा
भोजने अथवा ब्राह्मणा
ठेवून मनी कामना
पायी धोंडा मारती॥
ऐसे प्रेमे उमलून
यावे हृदय भरून
दत्त वदल्या वाचून
जावे की तरुन॥
मी तू पण सारे हरवून
आत्मरंगी त्या रंगून
जावे दत्तची होऊन
दत्त भजतांना॥
दत्त सांगे विक्रांता या
ऐसे प्रेमे भजावया
भाव उपजे ह्रदया
तीही कृपा तयाची॥
.********
© डॉ.विक्रांत प्रभाकर तिकोणे
https://kavitesathikavita.blogspot.com
**********
कोणत्याही टिप्पण्या नाहीत:
टिप्पणी पोस्ट करा