***
एक जीव दुज्या
खातसे जीवाला
देह दे देहाला
आकार तो ॥
मरणारा देह
होतसे खाणारा
तो ही उरणारा
नसे कधी ॥
अन्नाची साखळी
कुणाचा हा खेळ
पहावया वेळ
असे कुणा ॥
कुणी खातो एक
पाळूनया पशु
होऊनिया पशू
साखळीत ॥
देह मिळे देहा
पशु कुठे असे
चैतन्यास कैसे
कळू जावे ॥
पाण्यातला मासा
जैसा पाणीयाचा
अंश तो पाण्याचा
तैसे होय ॥
कुणास मग ते
कुणी रे खादले
कुणाला कळले
काय कधी ॥
विक्रांत कळणे
उडाले शून्यात
नाद आकाशात
उमटला॥
© डॉ.विक्रांत प्रभाकर तिकोणे
https://kavitesathikavita.blogspot.com
**********
कोणत्याही टिप्पण्या नाहीत:
टिप्पणी पोस्ट करा