कवितेसाठी कविता: तुझ्यावाचून

सोमवार, २७ मे, २०१९

*******:

सरला दिन तुझ्या वाचून

व्यर्थ जगलो जन्मा येऊन ॥

भांडी घासली या जगताची

कचरा पाणी गेले वाहून ॥

तेच हिशोब पुन्हा मांडले

त्याच खर्चात मन सांडून ॥

कळते मजला माझ्यावाचून

जग चालते युगे होऊन ॥

तरीही चाले उठाठेव ही

चक्र कुठले पायी बांधून ॥

नकोस जावू असे सोडून

दत्ता भगवे स्वप्न मोडून ॥

माळावरती पडली काडी

तुझ्या धुनीत जावी जळून ॥

जळता देह या जन्मातून

तुझाच दत्ता जावो होऊन ॥

आस लागली विक्रांतला या

आतूर काया जावी मिटून ॥

कवितेसाठी कविता