कवितेसाठी कविता: तुला माझा मानतो मी

रविवार, १५ सप्टेंबर, २०१३

तुला जाणू पाहतो मी

अंधारात मीच माझ्या

मला शोधू पाहतो मी

फार काही दूर नाही

वाट जरी चांदण्याची

खिळलेत पाय माझे

भास खरा मानतो मी

केव्हातरी श्वासात या

चंदनाचा गंध होता

तोच श्वास आज पुन्हा

देवळात शोधतो मी

माथ्यावरी अबीर नि

गळा माळ तुळशीची

तोच तो असे मी वा

सोंगात या नटतो मी

लाख लाख यत्न माझे

जप तप ध्यान काही

व्यर्थ खेळ वाटे जरी

करू तेच जाणतो मी

विक्रांत प्रभाकर

http://kavitesathikavita.blogspot.in/

कवितेसाठी कविता