मंगळवार, ९ नोव्हेंबर, २०२१

भक्तीच्या पावुटी

भक्तीच्या पावुटी 
************

भक्तीच्या पावुटी 
चालो माझे मन 
प्रेमात न्हावून 
ज्ञानदेवा ॥

नको ऋद्धी-सिद्धी 
नको मानपान 
विषयांचे रान 
बोकाळले ॥

वाहता प्रेमात 
मज भेटू देत 
भक्तांची ती बेट 
जीवलग ॥

तया प्रेमळांची 
संत सज्जनांची 
घडो पाऊलांची 
सेवा मज ॥

तयांचे ते बोल 
ह्रदयाची ओल 
उतरून खोल 
प्रिय व्हावे॥ 

राम कृष्ण हरी 
वैखरी अंतरी 
अणुरेणू वरी 
गुंजो माझ्या ॥

येणे हा विक्रांत 
देवा सुखावेल 
देह सांभाळेल 
तुजलागी ॥
🌾🌾🌾

© डॉ.विक्रांत प्रभाकर तिकोणे 
https://kavitesathikavita.blogspot.com 
☘☘☘☘☘☘ .


कोणत्याही टिप्पण्‍या नाहीत:

टिप्पणी पोस्ट करा

शोध

शोध **** श्रेयाच्या शोधात चालतांना  जगण्याचे इप्सित गाठतांना  श्वासात श्वास असे तोवर  आकाशपाताळ एक कर  पालथ्या घाल दाही दिशा  वि...