कागदाचे ऋण
***********
कागदाचे ऋण वाहते जीवन
अरे तया विन
सारे उणे ॥
शिकलो अक्षरे
तयात पाहून
आकडे घोकून
पाठ केले ॥
किती चित्रकथा
वाचल्या सुंदर
कौतुके अपार
दाटुनिया ॥
जाहली ओळख
आणि कवितेची
माझिया प्रितीची
हृदयस्थ ॥
ज्ञानाचे भांडार
आणले समोर
चांगला डॉक्टर
घडविले ॥
अन मग भेटी
आली ज्ञानदेवी
कागद ते दैवी
अपूर्वच॥
जाहलो आनंद
रंगून तयात
सुख मूर्तिमंत
भरलेला ॥
गाथा दासबोध
कृष्णमूर्ती थोर
बुद्धादिक येर
मिळविले ॥
गिर्वाण संस्कृत
आंग्ल नि भाषेत
गेलो भटकत
अनिवार॥
कोरेपणी केले
मज ब्रह्मदेव
कवितेचा गाव
रचियता ॥
माझ्या जीवनात
असे हा कागद
मज अलगद
सांभाळता ॥
सुखात दुःखात
यशपयशात
जाहला तो देत
साथ मला ॥
आताही हातात
धरूनिया हात
असे मिरवत
लिहलेले ॥
जर हा नसता
कागद जीवनी
विक्रांत वाहनी
व्यर्थ होती ॥
कोणत्याही टिप्पण्‍या नाहीत:
टिप्पणी पोस्ट करा