करावे ते आता
भार झाला माथा
जगतांना ॥१॥
किती उपदेश
ज्ञानाच्या या वार्ता
परी घडा रिता
सर्वथैव ॥२॥
बहु गोड वाटे
भक्तांचिया कथा
देव त्या भेटता
गोष्टींमध्ये ॥३॥
धाव धावुनिया
सरेना हा रस्ता
कारे अवधूता
माझा असा ॥४॥
साऱ्या जीवनाचा
जाहला चकवा
कुणाला सांगू दावा
दिशा मज ॥५॥
विक्रांत उदास
दिसेना प्रकाश
शब्द महारास
निरुद्देश ॥६॥
***********
© डॉ.विक्रांत प्रभाकर तिकोणे
https://kavitesathikavita.blogspot.com
कोणत्याही टिप्पण्या नाहीत:
टिप्पणी पोस्ट करा