कवितेसाठी कविता: प्रश्न

मंगळवार, ३ जून, २०२५

*****

अवघा व्यापून जगतास दत्त

असे जळागत सर्वकाळ ॥१

आत नि बाहेर काही तयाविन

नाही रे ते आन कळे मज ॥२

जळात या जन्म जळात जीवन

जळीच संपून जाणे अंती ॥३

पण कशासाठी कळेना अजून

ठेवी भांडावून यक्षप्रश्न ॥४

कोणी म्हणे लीला काढी समजूत

ऐसे हे सिद्धांत किती एक ॥५

परी त्या रे कथा अवघ्या गोष्टींच्या

गमती न साच्या मजलागी ॥६

पण तयाहून काही संयुक्तित

नाही सापडत उत्तरही ॥७

पण कुठेतरी असेल ती वाट

प्रवाहात घाट उतरला ॥८

तया त्या वाटेला लावूनिया डोळा

विक्रांत हा खुळा प्रवाहात ॥९

माता-पिता त्राता तोच एक दाता

तयाविन अन्यथा गती नाही ॥१०

तोच तो रे प्रश्न तोच तो उत्तर

परी कै देणार ठाव नाही ॥११

🌾🌾🌾

https://kavitesathikavita.blogspot.com

☘☘☘☘ 🕉️