कवितेसाठी कविता: सत्ता

शनिवार, ६ ऑगस्ट, २०२२

*****:

जरी पदोपदी असे तुझी सत्ता

लागतो न पत्ता कधी तुझा ॥१

तुझ्या माझ्यामध्ये मायेचा पडदा

का रे हा सर्वदा टांगलेला ॥२

बहु लांब रुंद बदले क्षणात

पाडी संभ्रमात मजलागी ॥३

जीवलग नाती प्रीतीच्या त्या गोष्टी

संसार आसक्ती सुटेनाचि ॥४

हुशारीच्या बाता ज्ञानाचे दर्शन

येतसे घडून वारंवार ॥५

देहाच्या संगती गुणाचे वर्तन

चाले रात्रंदिन जीवनात ॥६

थकलो कृपाळा साऱ्या पसार्‍यास

प्रभू तुझा दास शक्तीहीन ॥७

कृपाची केवळ अन्य न साधन

त्राही भगवन तूच मज ॥८

विक्रांत पतीत संसार पंकात

धरून मनात आशा तुझी ॥९

🌾🌾🌾

https://kavitesathikavita.blogspot.com

☘☘☘☘☘.