संत गजानन महाराज

 संत गजानन  महाराज
*******************
नाही बंकटाची दृष्टी
हरी पाटलांची भक्ती
बाबा गजानना तरी
ठेवा दासावरी प्रीती

नाही भाऊंचे ते प्रेम
देव थांबले उपाशी
नाही पितांबरी निष्ठा
पाने आणली आंब्याशी

मागे करूणा तरीही
पदी घ्या हो दिगंबरा
रूप स्वरूप दाऊनी
वास करा हो अंतरा

बाळाभाऊ गत थोडे
तुझे प्रेम मज देई
बाबू काळेंचे ते भाग्य
देवा विठ्ठल तू होई

भक्त थोरला तो तुझा
असे भोकरे आगळा
तैसा करी काही मला
सदा ठेवा हो पावुला

देई चरित्र पावन
जैसी बायजा माळीण
नका करू हो कधीही
विठोबा वा तो लक्ष्मण

वाट दत्तात्रया माझी
कुळ दत्तात्रेय माझे
 रूप दत्तात्रेय तुझे
लीला अवतार साजे

दान मागतो प्रेमाचे
दत्त अवतारी देवा
नका करू हो दुरावा
दास आपुला करावा

एक तुकडा भक्तीचा
देई तुझ्या भाकरीचा
तुझ्या दारात  विक्रांत
असे याचक जन्माचा

© डॉ..विक्रांत प्रभाकर तिकोणे
http://kavitesathikavita.blogspot.in