कुणासाठी
*******
कुणासाठी कोण कधी काय इथे असते रे
ज्याचे त्याचे जगणे हे
ज्याचे त्याचे असते रे ॥
तिचा लोभ याच्यावरी
याचे प्रेम तिच्यावरी
सुख होते कुण्या जीवा
मोरपीस कुण्या उरी ॥
माझे प्रेम माझ्यावरी
तुझे प्रेम तुझ्यावरी
मोहरून जाता मन
गाणे येथे ओठावरी ॥
प्रेमासाठी द्वैत हवे
सुखा हवे दुजेपण
म्हणूनिया प्रेमा सदा
शोधतसे वेडे मन ॥
प्रेमासाठी प्रेम कुणा
काय कधी मिळते रे
सुरक्षित घर एक
साऱ्या हवे असते रे ॥
मानु नका त्याला तसे
पण खरे असते रे
सत्य पचवणे इथे
अरे सोपे नसते रे
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘
