कवितेसाठी कविता: स्वामी अंतरात

सोमवार, ९ जानेवारी, २०२३

************

आज पावसात आलो रे भिजून

स्वामींना पाहून अंतरात ॥१

पाहिली ती मूर्त नच पाहियली

मनी ठसलेली आपसूक ॥२

ऐकले बोलणे कानी न पडले

मधाळ कोवळे हळुवार ॥३

जाहले उघडे मन दडलेले

दिगंबर भोळे बाळापरी ॥४

घेतला प्रसाद हळूच हातात

टाकला मुखात आनंदाने ॥५

अन वाचली ती नित्य ज्ञानेश्वरी

शब्द कृपा करी निवडक ॥६

तरारले तृण गेलेले वाळून

तार झंकारून आली सोहं ॥७

पाहियले ऐसे स्वप्न जागेपणी

विक्रांते रंगुनि चरित्रात ॥८

🌾🌾🌾

कवितेसाठी कविता