बोलावणे
********
आले बोलावणे
आले गं साजणे
बोलावणे
कण कण होय
धुंद आनंदाने
रुपेरी चांदणे
डोळीयात
चालेन गं आता
मोहक ती वाट
अनवट घाट
आवेगाने
जीवलग गाव
गावाची ती वेस
करता प्रवेश
मोहरेल
आणिक माझिया
जीवाचे ते घर
पंचेंद्रिया धर
नसलेले ॥
भेटता तयाला
देह हा वाहीन
प्राण मी अर्पीन
सांगू काय ॥
सुखाचे साजीरे
वस्त्रचि नेसेन
अहंता सांडेन
मळलेली ॥
प्रेमाची नुतन
दृष्टि मी होईन
डोळ्यात नांदेन
भक्तांचिया
विक्रांत आतूर
मनात काहूर
कधी गिरणार
पाहील गं ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘☘.
कोणत्याही टिप्पण्या नाहीत:
टिप्पणी पोस्ट करा