राम माझा बुद्ध तुझा

जगण्याला भूमी दे रे 
सत्य शिव सुंदराची 
माणसाला येवू दे रे 
जाण त्या सर्वात्मकाची
 
द्वेष नको मत्सरही
मांगल्याची प्रभा व्हावी 
उमलून कणोकणी
श्रद्धेची सुमने यावी 
 
धर्मातरी वाटलेली 
मती ही निष्पाप व्हावी  
सख्य बंधुत्वाची उषा 
मनी उगवून यावी   
 
राम माझा बुद्ध तुझा 
कुणाची न चेष्टा व्हावी 
सद्भावना प्रेषितांची 
जगण्याची भाषा व्हावी 
 
देव देश धर्म माझा 
फक्त माणसाचा राहो 
वर्ण जात गोत्रासवे 
विक्रांत वाहून जावो 
 
डॉ.विक्रांत प्रभाकर तिकोणे
http://kavitesathikavita.blogspot.in