दत्ता तुझी आस
लागली प्राणास
जाळतात श्वास
रात्रंदिन ||१
दत्ता तुझा भास
होतसे मनास
जीव हा उदास
तळमळे ||२
जावे गिरणारी
धावुनी माहुरी
वा गाणगापूरी
वाटे सदा ||३
बघ इथे आता
जीव न रमतो
कासावीस होतो
तुजविन ||४
संसाराचे ओझे
वाही कसेबसे
पांघरून पिसे
लौकीकाचे ||५
काय तुज देणे
भक्ती अवघड
विक्रांत हा जड
आवडेना || ६
माऊलीच्या पोटी
राग बरा नाही
द्वाड लेकराही
पोटा धरी ||७
आणि काय तुज
मागू सांग आई
चरणासी घेई
विक्रांता या ||८
डॉ.विक्रांत प्रभाकर तिकोणे
कोणत्याही टिप्पण्या नाहीत:
टिप्पणी पोस्ट करा