बुधवार, ८ जून, २०१६

निरर्थ पसारा






अरुंद गल्लीत 
अंधारी महाल
जगणे हलाल
स्वीकारले ||

आजचा हिशोब
बाटलीत बंद
जीवन संबध
मिटलेला ||

जडावलेमन
सुस्तावले तन
उठते चिडून
नाईलाजे ||

करी आटाआटी
चोरी वा चाकरी
लाचार उधारी
ठरलेली ||

किती आले अन
वाहुनिया गेले
कुणी मोजियले
दिन साल ||

अंधार मनात
अंधार जगात
जीवनाची वात
विझलेली ||

कुजले जीवन
वाहते गटार
साचले अपार
खरकटे ||

नवा जन्म येतो
अंधार घेवून
अंधारी पिवून
चालू लागे  ||

कशाला मांडशी
निरर्थ पसारा
सांग रे दातारा
जीवनाच्या ||

डॉ.विक्रांत प्रभाकर तिकोणे  



कोणत्याही टिप्पण्‍या नाहीत:

टिप्पणी पोस्ट करा

दर्शन हेळा मात्रे

दर्शन हेळा मात्रे ************ पायावरी माथा होता माथेकरी कुठे होता  क्षण काळ हरवला  क्षण सर्वव्यापी होता ॥ युगे युगे म्हणतात  हर...