यशोधरा 2

यशोदरा 2

********

साऱ्याच शपथा 

तुझ्या मोडतांना 

देह वा-यावरी  

असा सोडतांना 

मागतो क्षमा मी 

सखी चालतांना 

अर्थ जीवनाचा 

खरा शोधतांना

तुझी प्रीत होती 

बहर उद्याचा 

स्वप्न सजलेला 

मांडव सुखाचा 

पण जन्म माझा 

अशी आग झाला 

जाळूनी मजला 

घेऊन तो गेला

तुझा वादळाचा 

श्वास सुमनांचा 

तुझा सांत्वनाचा 

स्पर्श  मेघुटांचा  

नाही कसे म्हणू 

होतो ओढावलो 

दोष तुझा नच 

कोरडा राहीलो

माझीही युगांची 

तृषासे प्रभूंची 

ओढ जाणण्याची 

जन्म कारणाची 

तुझ्या प्रितीची मी

वाहतो फुले ही 

तयाच्या पदाला 

दिलीस तू काही

डॉ.विक्रांत प्रभाकर तिकोणे

http://kavitesathikavita.blogspot.in‍

000

घनरानी अंधारात

घनरानी अंधारात

*************

घनरानी अंधारात 

कोण होते सखी साथ  

पायाखाली विंचू काटे 

तया दूर ते सारत 

तुटलेल्या पावलात 

कोण होते बळ देत

शिणलेल्या या श्वासात 

चैतन्याचा स्पर्श होत  

खोलवर अंतरात 

कोण होते सांग गात 

कणोकणी भरलेल्या 

विश्वासाला चेतवत 

शोधू शोधू जाता तया  

चांदण्यात लुप्त होत 

मिटताच डोळे आत 

देहभान हरवत

गिरनारी सखा माझा 

माझ्या सा-या जीवनात ज

करूनिया घेत तप

जीवनाला अर्थ देत

                         :**

डॉ.विक्रांत प्रभाकर तिकोणे

http://kavitesathikavita.blogspot.in‍

००००००

दिधले दत्ताने

दिधले दत्ताने 

********

खंत ना मजला 

आता ती कशाची 

आहे रे जायची 

तयारी ही ॥

अविट क्षणांचे 

सुंदर जगणे

दिधले दत्ताने 

मज ऐसे ॥

आप्त गोत्र आणि 

प्रिय मित्र सारे 

आनंदाचे झरे 

लेक बाळ ॥

सहज सुखाची 

जीवनसंगिनी 

अपार मी ऋणी  

तिचा असे ॥

धन्य माता पिता 

आलो तया पोटा

भाग्याच्याच वाटा 

जणू काही ॥

भेटले कीतीक

सखे सवंगडी 

हितचिंतक ती

पदोपदी ॥

कुणी थांबविले 

कोणी अडविले 

त्यात दडलेले 

दैवी हात ॥

जाहाले ते दृष्य 

येताच सुवेळ 

नच तयावर 

राग काही॥

मनी उमटती

फक्त कृतज्ञता

अवघ्या जगता 

देण्यासाठी ॥

कितीदा बोलावे 

साऱ्या धन्यवाद 

जोडूनिया हात 

नमितो मी ॥

विक्रांत सुखाचा 

दत्ताच्या कृपेचा 

भेटल्या जन्माचा 

ऋणाईत ॥

.

डॉ.विक्रांत प्रभाकर तिकोणे

http://kavitesathikavita.blogspot.in

००

दत्त प्रेमे

दत्त माझे घर 
दत्त माझे दार 
दत्त हा संसार 
अंतर्बाह्य 

दत्त माझे  सुख 
दत्त माझे दुःख 
स्वानंदाची भूक 
दत्त माझा 

दत्त माझे गाण 
दत्त माझे भान 
दत्त समाधान 
श्वासातले 

दत्त माझे कर्म 
दत्त माझा धर्म 
जगण्याचे वर्म 
दत्त होय

दत्त ओतप्रोत 
पाहतो विक्रांत 
दत्त प्रेमे न्हात
सुखावतो 

https://kavitesathikavita.blogspot.com/

तडजोड

करी जिंदगानी 
कुठे तडजोड 
जोडपी विजोड 
जगतात 

तिला तो मुळीच
शोभतही नाही 
तिला पर्वा नाही 
कुठे काही 

चाले व्यवहार 
देहाचा व्यापार 
फक्त कारभार 
जगण्याचा 

त्याला काही देणे 
तिला काही घेणे 
वाचुनी चालणे 
निराधार 

काय मिळविले 
वाहता बाजारी 
फाटलेली झोळी
अंतृबाह्य  

कशाला वाहती 
काळोखाचे भार 
प्रेत  जगणार 
आशाहीन 

विक्रांत पाहतो 
दुनिया अंधारी 
आपुल्या शेजारी  
दाटलेली 

फुंक दत्तात्रेया 
तयात तो  प्राण 
जीवनाचे दान 
देई तया

धुनी

धुनी

***

दत्ता माझ्या जीवनाची

व्हावी एक धन्य धुनी

चटचट जळतांना

दत्त शब्द यावे मनी

काम क्रोध लोभ सारे 

जळून या खाक व्हावे 

आत्मप्रकाशात दिठी

विश्व सारे तुच व्हावे

जळतांना जनासाठी 

सुख जळो लाख वाती 

सभोवर उबेसाठी 

भक्तांची रे व्हावी दाटी

चिमट्याचे अशीष ते

सदोदित पडो डोई 

विझणाऱ्या जाणिवेस 

जाग एक टक देई

विश्वाचे या भान मग

माझा क्षणक्षणा होवो  

विक्रांत हे नाव गाव 

दत्ता हरवून जावो

*

डॉ.विक्रांत प्रभाकर तिकोणे

http://kavitesathikavita.blogspot.in

स्वामींनी

तू स्वामींनी सखे 
या जीवनाची 
गृहस्वामिनी तू 
मम प्रपंचाची 

तू सारथी सखे 
माझिया रथाची 
अचूक माहिती 
ती तुजला पथाची 

तू कारभारीन 
सखे या घराची 
वजाबाकी ठाव 
तुजला बेरजेची

तू लेखिका सखी 
सहजीवनाची 
मुर्त स्वरूपच
सोबत सुखाची 

तू सावली सखे 
सदैव प्रीतीची 
तापल्या जिवाला
शीतलता साची 

तुजवीण सखें 
न गोष्ट जीवनाची 
अधुरीच सदैव 
कथा विक्रांतची

****