माझ्या तुकोबाचे

माझ्या तुकोबाचे l बोल करुणेचे

भरले दयेचे l कृष्णमेघ ll १ ll

शब्दो शब्दी असे l शुद्ध कळकळ l

व्हावेत सकळ l सुखी इथे ll २ ll

तिथे मुळी नाही l कसला पडदा l

आरसा नागडा l  मना दावी ll ३ ll

मुक्तीचे मौतीक l प्रत्येक शब्दात l

देई फुकटात l आल्या गेल्या ll ४ ll

परी जपूनिया l ठेवी हृदयात l

तोच भाग्यवंत l भक्त सखा ll ५ ll

विक्रांत प्रभाकर

http://kavitesathikavita.blogspot.in/

एकच नाम सतत

एकच नाम सतत l  माझिया हृदयात l 

आता आहे स्फुरत  l  श्री दत्त जय दत्त ll १ll  

माझे मन हासत l  आहे मजला सांगत l 

श्री दत्त स्मरणात l  सुख वाटे ll २ll  

पातलो समाधान l  शांतीचे वरदान l 

लाभता निधान l  श्री दत्त प्रेमाचे ll३ ll 

विक्रांत प्रभाकर

http://kavitesathikavita.blogspot.in/

पाहतो ते फक्त...

आजकाल मी कुणाचेही

चेहरे पाहत नाही

पाहतो ते फक्त पाय

काय म्हणता ?

आदराने !

त्यांच्यात देवत्व पाहून !!

नाही हो !

माझा पाय मुरगळून

तीन महिने झालेत

तेव्हा पासून !

फारच हेवा वाटतो हो ,

मला तुम्हा सर्वांचा

दोन तंदुरुस्त मजबूत पाय

खाड खाड चालणारे

दण दण पळणारे

यात काय सुख असते

ज्याचे पाय मोडतात

त्यांनाच कळते

विक्रांत प्रभाकर

http://kavitesathikavita.blogspot.in/

ॐकाराचा हुंकार

ॐकाराचा हुंकार l प्रगटला साचार l

होऊनि देहाकार l देव गजानन ll १ ll 

भावातीत ईश्वर l तया फुटे पाझर l

प्रेमलोट अपार l द्वैत सुखाचा ll २ ll 

अरुपाचा अनघट l पडदा सारत l

झाले घनीभूत l कैवल्यरूप ll ३ ll 

आनंदाचा कल्लोळ l सूर शब्द ताल l

अनाहताचा बोल l झाला प्रगट ll ४ ll 

रूप साजिरे घेवूनी l आले गुणातीत गुणी l

रक्त वर्णात सजुनी l पर्ण पिंपळावरी ll ५ ll 

विक्रांत प्रभाकर

http://kavitesathikavita.blogspot.in/