ओळख
*************
माझ्या मनाच्या अंगणी
स्निग्ध प्रकाश सौख्याचा
दत्त हृदय आकाशी
करी वर्षाव कृपेचा ।।
स्मृति पाचूच्या हिरव्या
चमचमती तेजात
कुण्या मागील जन्माच्या
स्मृती दिसती क्षणात ॥
भस्म लावूनी देहाला
होतो ध्यानस्थ पर्वत
शांत निरव एकांत
म्हणे शब्द दत्त दत्त ॥
साऱ्या मिटतात वाटा
मिटे सारा कोलाहाल
जीणे कृत्रिम कोरडे
स्थिरावते हालचाल ॥
रव रातीचे गुढसे
माझ्या गुंजतात कानी
कणकणात स्पंदन
जणू अवधूत गाणी ॥
पूर तेजात अलोट
म्हणे विक्रांत अलख
नाथ हसतो गोरख
देई आदेश ओळख ॥
***"
डॉ. विक्रांत प्रभाकर तिकोणे.
https://kavitesathikavita.blogspot.com
कोणत्याही टिप्पण्या नाहीत:
टिप्पणी पोस्ट करा