तुकोबाचे झाड
********
तुकोबाचे झाड गोड
नभाहून वाड झाले
नक्षत्रांच्या फुलांनी रे
बहरूनी जणू आले ॥
जमिनीत रुजलेले
कणकण जाणलेले
घाव घेत अंगावरी
जगताची छाया झाले ॥
भक्तिरसे ओथंबली
ब्रह्म फळे लगडली
ज्ञानेशांच्या पारावरी
थोर गुढी उभारली ॥
भाव विभोर त्या ठाई
पदी नमिताची होई
शांती सावलीत मन
भान हरवून जाई ॥
विक्रांत हा तया दारी
सदा भावाचा भिकारी.
पसरिता हात पुढे
शब्द दिले मुठभरी.॥
डॉ.विक्रांत प्रभाकर तिकोणे
https://kavitesathikavita.blogspot.com
कोणत्याही टिप्पण्या नाहीत:
टिप्पणी पोस्ट करा