दत्त आकाश

दत्त आकाश 

*********
दत्त आकाश कोवळे 
ओल्या पहाटे फुटले 
माझे मन डवरून 
दव चिंब ओले झाले

दत्त प्रकाश किरण 
आला मेघुटा मधून 
कांती उजळ सुवर्ण 
रोमरोम शहारून

दत्त फुलला मोगरा 
गंध आकाश भरला 
झालो पाकळी पाकळी 
रंग कर्पुरी भाळला 

दत्त पहाटेचा वारा 
सुख अविट शहारा 
आला घेऊन चंदन 
व्यापे मनाचा गाभारा

दत्त गवत ओलेते 
ध्वजा भगवी डोईते
चाले किर्तन रानात 
मन झिंगते रंगते 

दत्त विक्रांत सोइरा 
जीवी जीव या भरला 
पंच प्राणाच्या प्रकाशी
डोळा भरून पाहीला
+++
© डॉ.विक्रांत प्रभाकर तिकोणे
 http://kavitesathikavita.blogspot.in