मज लागले रे गुरुदत्त पिसे
अवधूत पिसे
दिगंबर ||१
मन विटले रे संसारा थकले
त्यांनीच दाविले
मृगजळ || २
लावूनिया डोळे तयाचिया वाटे
मोजितो मी बोटे
काळ गणी ||३
करितो नाटक जगी जगण्याचे
ध्यानी मनी त्याचे
रूप सजे || ४
कधी गल्लीतले श्वान भुंकतात
पाय धावतात
दाराकडे || ५
वाजे खटखट वारियाने दार
हृदय अपार
उचंबळे ||६
चंदनाचा गंध हीना दरवळ
ऐसे काही खेळ
मना चाले ||७
कधी एकटाच असता घरात
विभूती धुपात
नादावतो ||८
घेवूनी चिमटा नेसुनी लंगोटी
करुणा त्रिपदी
आळवतो || ९
असे कसेबसे निर्लज्य नाचरे
कोंडीतो मी सारे
देहभान ||१०
डॉ. विक्रांत प्रभाकर तिकोणे
http://kavitesathikavita.blogspot.in/
कोणत्याही टिप्पण्‍या नाहीत:
टिप्पणी पोस्ट करा