मंगळवार, २६ नोव्हेंबर, २०१३

माझ्या मना






या जगावर रुसलेल्या
आणि स्वत:वर चिडलेल्या
माझ्या मना
या जडशील वैफल्यातून
आणि अस्वस्थ कबरीतून
आशेच एक छोटस
रानफुल होवून वर ये
कुणी जल न सिंचता
कुणी लक्ष न देता
स्वत:च्या ताकदीने
बेदरकार हिंमतीने
स्वत:त भरून उरणारे
मीपण घेवून वर ये
पत्थराला  चिरत
मातीतून उसळत
हरित अंकुराने
लसलसत्या नव्हाळीने
रसरसत्या जीवनाचे
सार घेवून वर ये
चैतन्यान फुलून ये
बेफान उधाणून ये
आवेगाने उसळून ये
जीवनाचा प्रसाद वाहू दे
तुझ्या अणुरेणुतून
आणि पसरू दे
गंधलहरीतून   
सारे विश्व त्यानं
जावू दे भरून

विक्रांत प्रभाकर              
http://kavitesathikavita.blogspot.in/


रविवार, २४ नोव्हेंबर, २०१३

प्रीतीचा स्वीकार



प्रीतीचा स्वीकार
असतो संपूर्ण
इतर सारे
जाते हरवून

प्रीत स्वीकारते
हासत काटे
नच केवळ
फुले मागते

गुण दोष
दु:ख हर्ष
वेगळे नसती
प्रीतीत स्पर्श

प्रीत असते
एकतानता
दोन देह
एक आत्मा

विक्रांत प्रभाकर
http://kavitesathikavita.blogspot.in/


शनिवार, २३ नोव्हेंबर, २०१३

थोडासा डायजोनीस







म्हणतात लोक मजला नाटकी
घालतो फाटकी वस्त्रे उगा ||१
कंजूष भिकारी असून ऐपत
नसेच दानत मज मुळी ||२
तया काय सांगू कोणत्या उपाये
मजला न साहे व्यवहार ||३
काही देणे घेणे म्हणजे करणे
धन जमा उणे जगात या ||४
अश्या या खेळात पैश्याच्या जगात
भावाच्या होतात उर्मी शून्य ||५
धना चिकटता मन हे नासते
क्षणात धावते भोगा मागे ||६  
भोगत दु:खांचे सागर दडले
कितीदा पाहिले जन्मोजन्मी || ७
तया त्या दु:खाच्या अदृष्य वेदना
स्मृती स्मृतीविना जाळतात ||८
आता ऐसे काही सांगू जरी जावे
जनासी पटावे कैसे काही ||९
म्हणोनी साहतो मान्य हि करतो
जागी मिरवतो विशेषण ||१०

विक्रांत प्रभाकर
http://kavitesathikavita.blogspot.in/



अटळ

अटळ **** गिरनारी मूर्ती फुटली गोरक्षाची  ती कृती भ्याड नामर्द रात्रीची  अफगाणी मूर्ती फुटली गौतमाची  ती कृती उद्दाम  द्वाड दिवसा...