हट्ट

हट्ट

****

एक हट्ट माझा पुरवी दयाळा 

माळ तुझी गळा पडो माझ्या ॥

एक स्वप्न माझे येऊ देत फळा 

पाहू दे रे डोळा रूप तुझे ॥

एक अर्थ माझ्या देई रे जीवना 

पायीच्या वाहणा करी मला ॥

अगा ज्ञानदेवा जीवीच्या जिव्हारा 

पावुलाशी थारा देई मला ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..

आळंदीत

आळंदीत

********

चालला गजर राम कृष्ण हरी 

 नाद नभावरी दुमदूमे ॥

 वाहे खळखळ इंद्रायणी जळ 

जाय मनोमळ वाहूनिया ॥

वैष्णवांची दाटी लाट लाटेवरी

पुण्य भूमीवरी पुण्यमूर्ती ॥

जया जैसा भाव तया तैसे फळ

माऊली दयाळ देत असे ॥

भारलेले क्षण दिव्य कणकण 

गेलो हरखून पाहुनिया ॥

विक्रांता जाहले जड देह ओझे 

चित्त चैतन्याचे साज ल्याले ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..

सावल्या

सावल्या

****

जरी जीव खुळा उतावीळ होता 

कुणासाठी तरी टाळल्या मी वाटा 

कुणासवे तरी थांबलो बोलता 

मनात असंख्य असून कविता 

कुणा सवें झालो तटस्थ उदास 

कोरडी करून डोळ्यातील आस 

असेल कुठल्या जन्माचे हे देणे 

अथवा पुढे हे ऋण मी फेडणे

किती सोडवल्या बसलेल्या गाठी 

 नच येवू दिले नाव ते ही ओठी

परी कानी येती कुठले हे सूर 

विराण एकांती उरी का काहूर 

सुटूनिया गेले गाव दूरवर

तरी खुणावती वाटा का धूसर

हालती सावल्या मनात दडल्या 

चाहुली वाचून भोवती दाटल्या

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..

ज्ञानदेवा - प्रार्थना

ज्ञानदेवा - प्रार्थना

***************

उगमाला ओढ सदा सागराची 

तशी ह्या जीवाची दशा होय॥१

नुरो माझेपण उरो तुझेपण 

घडो समर्पण ऐसे काही ॥२

सरो माझी वाट तुझ्या आळंदीत 

वळणे परत घडू नये ॥३

सरो माझे श्वास तुझ्या गाभाऱ्यात 

देह निर्माल्यात जमा व्हावा ॥४

अस्तित्व कापूर पेटो धडाडून 

नुरावे निशाण इवलेही ॥५

इतुकी प्रार्थना माझी ज्ञानदेवा 

तुझाच मी व्हावा माझेविना ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..

रंग

रंग

***"

उधळलेस रंग किती 

रंगीत झाले जीवन 

सरुनही सण सारे 

उतरती न अजून ॥

रंग तुझ्या डोळ्याचे 

रंग तुझ्या स्पर्शाने 

रंग तुझ्या लोभाचे

रंग तुझ्या रागाचे ॥

जीवनाची सारी पाने 

गेली रंगीत होऊन 

उलटून पाहताना 

गमती ताजी अजून ॥

तुझ्यामुळे मजलागी 

रंग जीवनाचा कळे 

प्रेम विरह ओढीचे 

इंद्रधनु मनी झुले ॥

उधळले काय किती 

मी मज नच स्मरते 

हासू तुझ्या डोळ्यातले 

कृतार्थ मज करते ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..

येणे जाणे

येणे जाणे

*******

माझे असणे तुझ्या मधले

कळल्याविना मजला कळले ॥१

असो थांबले असो वाहिले 

वारे नभात सदैव भरले ॥२

ऋतु ऋतूत रंग वेगळे 

तप्त कधी वा थंड गोठले ॥३

कधी धुरात धुक्यात भरले 

आकाश परि ना कधी मळले ॥४

तुझ्याविना न काही इथले

असणे नसणे माझे कुठले ॥५

देणे तू तर होऊन गिळले 

घेणे मग मज नाही उरले ॥६

तुझा असे मी सदैव तुझा रे 

येणेजाणे हे कधी न जाहले ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

माय

 

माय

****

अजात पाखरावर 

आपल्या पंखाची 

पाखर घालणारी 

माय कधी मरू नये 

प्रेमाने सौख्याने मायेने  

घर सांभाळणारे

आधार कधी मोडू नये 

या तुझ्या जगात देवा 

सुख भरपूर आहे 

घे सारे परत हवे तर पण 

बाल्य कुणाचे करपू नये 

होय मला मान्य आहे 

तुलाही मर्यादा आहेत 

जन्म मरणाचे नियम तुझे  

सारेच निष्ठूर आहेत

पण तिच्याशिवाय सांग 

आम्ही तुला कुणात पाहू रे

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ ..