आलो गिरनारी

आलो गिरनारी देवा

हाक ऐकून आतली

धाव धावून प्रेमाने

जिवलग म्यां पाहिली 

आधी भेटलो शिवाला

भवनाथांच्या रूपाला

धूळ संतांच्या वाटेची

मग लावली भाळाला 

असे पायथ्याला बळी

बाहू उभारून प्रेमे  

उभ्या उभ्याने हसत

भेटे मारुती सुखाने 

गात अलख अलख

गेलो गुहेमध्ये खोल

गोपीचंद भृतहरी

देती जीवास या ओल

आई नमिली अंबाजी

शक्ति पीठ ते थोरले

तिचे शक्ती कृपेमुळे

बळ पावुलात आले 

जैन सिद्धनाथ थोर

भेटे अरिष्टनेमी ही

तया संनिधी लागली

ज्योत शांतीची ह्रदयी

उंच शिखरी गोरक्ष

प्रिय सखा तो दिसला

त्याच्या मिठीत नयनी

पूर आनंदाचा आला 

मग दिसले शिखर

भाव झाले अनावर

देव दत्तात्रेय माझा

माझ्या जीवाचे जिव्हार

झाले चरण दर्शन

गेलो सुखे वेटाळून

गुरू सानिध्य क्षणाचे

यात्रा विक्रांत संपूर्ण 

© डॉ.विक्रांत प्रभाकर तिकोणे
http://kavitesathikavita.blogspot.in

येई रे बाहेर

येई रे बाहेर
********

जुनाट घरांचे

जाहले इमले

देवांनी दाविले

दिना बरें ॥

बहु मिरवितो

सुवर्ण गळ्यात

बोटात कानात

कमविले॥

मागणी तसाच

असे पुरवठा

जगाचा रोकडा

व्यवहार ॥

चालू दे रे जग

बरे गांजलेले

भक्तीचे सोहळे

मतलबी ॥

अन्यथा होतील

हजारो बेकार

मध्यस्थ दलाल

दारातले ॥

विक्रांत बोलावी

येई रे बाहेर

आतला अंधार 

टाकुनिया॥

© डॉ.विक्रांत प्रभाकर तिकोणे
http://kavitesathikavita.blogspot.in

डिंगा

डिंगा
***
 कालपर्यंत कंपाऊंड साफ करणारा
अन् आवर्जून दाखवणारा डिंगा
आज आपल्यात नाही
खरंच वाटत नाही ।
जरुरीपेक्षा जास्त पगार
अन त्यातून येणारी नशा वृती
अन् त्यामुळे होणारी
 खाण्यापिण्यातील आबाळ
 व त्यामुळे उद्भवणारा टीबी
 हा महानगरपालिकेतील
सफाई कामगारांच्या
नशिबात असलेला
एक अटळ शापच आहे

तसेच अनुवंशिक पणे आलेला डायबेटिस
त्याला सोबत करीत होता
पण त्या साऱ्यांशी लढून
डिंगा त्यातून बाहेर पडला होता

आणि मनापासून काम करीत होता
म्हणायचा," साब मैं और चार साल तो जी लुंगा ना ?"
मी हसून विचारायचो " क्यों"?
 म्हणायचा "घर की सब व्यवस्था लगाने की है"
 मला सारे रिपोर्ट आणून दाखवायचा
मी ते पाहायचो
बहुदा ते नॉर्मल असायचे
आणि मी त्याला म्हणायचो "नहीं कुछ नहीं होगा और दस साल!
खरच असे काय कारण नव्हते
तरीही तो अचानक गेला
लागता लागता नाव किनाऱ्याला
 तिला बसावा पुन्हा वादळाचा तडाखा
अन  ती व्हावी क्षतीग्रस्त जावी तळाला
मावुलींची हि उपमा मनात तरळून गेली
खरेच तसेच काही झाले होते येथे
 असे का व्हावे ?
याला तर तशी बरीच उत्तरं होती
अन् खरं म्हटले तर काहीच उत्तर नव्हते

© डॉ..विक्रांत प्रभाकर तिकोणे
http://kavitesathikavita.blogspot.in

खगराज दत्त

जैसा गरुड तो नेतो उचलून

मासा अलगत पायी पकडून

तैसे मजला घेई ओढून

दत्तराज खग बलिष्ठ होऊन

सुखासीन मी या जगतात

हरवून गेलो माझ्या खेळात

किती काळ ते माहित नाही

पाणी इथले संपत नाही

कधी तरी पण जावे उजळून

तम गोठले हे प्रकाश होऊन

जल पृष्ठावर येतो उसळून

लक्ष पुन:पुन्हा घेतो वेधवून

जगतो विक्रांत भिजल्यावाचून

तव स्वरूपात जाण्या हरवून

त्या मत्स्याचे भाग्ये इछून

जे सुटले या जन्म मरणातून

© डॉ..विक्रांत प्रभाकर तिकोणे

http://kavitesathikavita.blogspot.in

मागितले दत्ता

मागितले दत्ता

*************

मागितले दत्ता

मागणे नसून

मागणे सरुन

तुची होय ॥

प्रकाश पाझर

चैतन्य जागर

भक्तीची अक्षर

होवो ओठ  ॥

सुटावे जगत

आणि सोडवण

कृपेची किरण

जन्म सारा ॥

अनित्याच्या लाटी

फेना न गणती

परि आस मोठी

तया पोटी ॥

प्रभू अंतर्यामी

वसे कणोकणी

जाणे विनवणी

प्रत्येकाची ॥

जावो माझेपण

उरो तुझे पण

विक्रांत कारण

असण्याचे ॥

© डॉ.विक्रांत प्रभाकर तिकोणे
http://kavitesathikavita.blogspot.in

*****

उदास हे मन

उदास हे मन 

************

उदास हे मन 

दत्ता तुज विन

कृपाळू येऊन 

शांत करा ॥

इतुके न पुण्य 

माझिया गाठीस

तव स्वरूपास

प्राप्त व्हावे॥

फक्त एकदाच 

एक क्षणभर

सरावे अंतर 

तव स्पर्शी ॥

सारी होरपळ 

मिटो भगवान 

जीवनाचे गाण

 उमलून॥

विक्रांत जगात 

चालला वाहत

किनारा शोधत 

जिथे तू रे ॥

© डॉ.विक्रांत प्रभाकर तिकोणे
http://kavitesathikavita.blogspot.in

***::

दत्त गाणं हे

दत्त गाणं हे

येई मुखातून

दत्त वदवून

घेई सुखे

अथवा काय ती

माझी हिंमत

मजला किंमत

जगामाजी

दत्तक प्रेमे

शब्द कोवळे

हृदयी फुलले

धन्य झालो

तुझाच वाहक

दयाघना मी

सदैव ठेवूनी

घेई पायी

नकोस देऊस

व्यर्थ अभिमान

वक्र कमान

ताठयाची ती

नाव जरी तव

पदात ठेवतो

फूल मी होतो

शब्दातले

© डॉ.विक्रांत प्रभाकर तिकोणे
http://kavitesathikavita.blogspot.in