जे बुध्दा होते कळले

कळेल काय मज ते

जे बुध्दा होते कळले  

हसुनी गुरु यावर    

जरूर मज वदले  १

त्याआधी पण झाडांशी

तुज पाहिजे बोलले 

अन गीत चांदण्यांचे

हवे उगाच ऐकले   २

  

विक्रांत प्रभाकर

http://kavitesathikavita.blogspot.in/

बंदुक आणि शब्द

असा निराश होवू नको    

असा उदास होवू नको

हातामध्ये बंदूक घ्यायची

वेळ तर आणूच नको

भ्रष्टाचाराच्या बाजारात

सत्तेच्या दलालात

जीव पिसून गेला आहे

प्रत्येक हाताला कुठेतरी

कधी डाग लागला आहे

पापी कोण हे त्या

बंदुकींना कळले तर

भरल्या बंदुका नक्कीच

उलटतील घेणाऱ्यावर

माझ्या मुळे सत्ता आहे

मीच व्यवस्थेची वीट आहे  

मीच मला सांगा कसे

उपसून दूर भिरकावणार ?

या जगात नाही केवळ

एकच पिसाट तुझ्यागत

इथे तिथे आहेत

हजार वेडे धडाडत

बोलत नसले तरीही

अन्यायाशी झगडत

ती ताकत त्यांना आहे

तुझ्या शब्दातून मिळत

विक्रांत प्रभाकर

http://kavitesathikavita.blogspot.in/

म्हातारपण

पिकलेल्या फळासारख

असाव म्हातारपण

मधुर हळव रसरसलेल

हळू हळू आपणच आपल

आंबटपण टाकलेलं

उन वारा पाऊस खात

आयुष्य जाणून घेतलेलं

तारुण्यातील निबरता

विसरून गेलेलं

सहजच आणि आता

मृदुता धारण केलेलं

जपायचं तेवढ जपलं

मिळवायचं तेवढ मिळवलं

वाटायला आता अधीर,

उत्सुक असलेलं

विक्रांत प्रभाकर

http://kavitesathikavita.blogspot.in/

देवाकडे पाहू नका

देवाकडे पाहू नका

भाव भोळा आणू नका

व्यवहारात भावनेचा

घोळ उगा घालू नका ll १ ll

देव सदा उभा आहे

पण हाक देवू नका

जन्माची वाट लागेल

भुली त्याच्या पडू नका ll २ ll

हळू तो मनी शिरता   

जग निरर्थ दिसेल  

कमावलेले अवघे

मग नकोसे वाटेल   ill ll ३ ll

माझे जरा नीट ऐका

अशी चूक करू नका

सुखी तुमच्या संसारा

आग उगा लावू नका ll ४ ll

देव छान मंदिरात

वा दिसे देवघरात  

आणताच जीवनात

समजा गेला खड्ड्यात   ll ५ ll

काम धंदा रोजगार  

सारा सुटून जाईन

पैश्यापाण्याविना तुम्हा  

भीक मागणे उरेन ll ६  ll

बायको पोरे मित्रादी

सारी दूर लोटतील  

घेणाऱ्यांच्या जगात या  

तुमचा कोण राहील   ll ७ ll

पूजाअर्चा दानधर्म

कथा व्रते यात्रा करा

वरवर पण जरा

मनी देऊ नका थारा  ll ८ll

विक्रांत प्रभाकर  

http://kavitesathikavita.blogspot.in/