इंस्पेक्टर सचिन सूर्यवंशी निमित्ताने

  

चाटतात सदा पाय
धावतात पैश्यामागे
तयाचे हे भूत तुवा 
सूर्यवंशी आज लागे

मारणारे गुंड होते
त्यात नवीन काय ते
अरे पण तुम्ही तया
सदा मिरविले होते

आठवता धर्म आज
जरी केलेत चांगले
आजवरी भुजंगास
त्या दुध होते पाजले

घमेंडी नृपा नावडे
सरदार बाणेदार
शिरताच सत्ता शिरी
करे प्यादेही बेजार

भीम व्हा युधिष्ठीराचे
हात तुम्ही जाळणारे
रक्त दु;शासनी उष्ण
घटघटा प्राशणारे

विक्रांत प्रभाकर
http://kavitesathikavita.blogspot.in/

आरती प्रभू

                                       
                                                

आरती प्रभू नावाची

एक गूढ गोष्ट आहे

कधी कळणारी तर

कधी नच कळणारी

कधी कळतेय असे  

वाटत असतांनाच     

आपणा भोवळणारी   

हरवून टाकणारी       

हि गोष्ट घेवून जाते    

आपल्याला धुंदावत    

हिरव्यागार रस्त्याने    

पाखरांच्या गाण्यातून  

झऱ्याच्या नादामधून    

सुमधुर स्वप्नातून        

आळूमाळू रूपातून          

हळू हळू आपणही        

आत जातो नादावून

एका अनाकलनिय

अनोख्या दुनियेत

अन तिथे ती गोष्ट

आपल्याला एकदम

एकटे सोडून जाते

मग जाणवतात

मोहक वाटणाऱ्या त्या

वृक्षांच्या फांदी फांदीत

लपलेले अजगर

हिरव्या पानामागील

काळा काळा अंधार

पायाखाली सळसळ

झुडूपात वळवळ

उरतो केवळ एक

जीवघेणा एकांत

अन हि गोष्ट संपते

विक्रांत प्रभाकर

दु:खाने चिंब भिजलेली ...

दु:खाने चिंब भिजलेली

कविता वाचतांना  

दु:खाने कदमदलेले जीवन

ओढत चालतांना

किती आधार वाटतो मला

त्या शब्दांचा

शब्द सांगतात मला

दु:खाचे चिरंतन सत्य

मानवी जीवनाचे अटळ प्रारब्ध

आणि माझी व्यथा होते

साऱ्या मानव जातीची

माझ्या दु:खातील मीपण

जाते वितळून

मग मी वेगळा होवून ,

सारे दु:ख खिशात ठेवून

थोपटतो त्याला असू देत म्हणून

आणि मानतो आभार

दु:खाच्या प्रत्येक कवितेचे

वेदनेची फुले वेचणाऱ्या

प्रत्येक कवीचे

विक्रांत प्रभाकर

http://kavitesathikavita.blogspot.in/

काजव्यांची दिवाळी

 

तझ्या हाती काजवे ,
हळुवार देत होतो ;
हात तुझा हाती माझ्या ,
हलकेच घेत होतो ;

तो स्पर्श तुझा नवखा,
जणू की मागत होतो ;
चांदण्याच्या मोहराने,
देहात फुलत होतो ;

निरागस हासत तू ,
सारेच हाती घेतले ;
उजळल्या डोळी तुझ्या ,
मग मीच गात होतो;

घेवूनी क्षणात पुन्हा ,
तू तया सोडून दिले ;
काजव्यांची दिवाळी ती,
मीच उजळत होतो ;

विक्रांत प्रभाकर 

http://kavitesathikavita.blogspot.in/

श्रीदत्त नामाचे l

श्रीदत्त नामाचे l निधान भेटले l जीवास लाभले l महासुख ll १ ll

कैवल्य सुखाचा l महापूर आला l देहीच पाहिला l निर्विकार ll २ll

श्वास प्रश्वासाच्या l जपे अनुष्ठिला l हरवूनी गेला l पाहणारा ll ३ ll

शून्याच्या गाभारी l चैतन्य पुतळा l पाहिला मी डोळा l अनुपम्य ll ४ll

भाग्याचा सोयरा l जाहलो सहज l गेली गजबज l भवचिंता ll ५ ll

जाहले कल्याण l माझिया जन्माचे l परत येण्याचे l नुरे काज ll ६ ll

विक्रांत प्रभाकर

http://kavitesathikavita.blogspot.in/