कवितेसाठी कविता: ज्ञानदेव

रविवार, ३ नोव्हेंबर, २०२४

******

ज्ञानदेव देही ज्ञानदेव मनी

स्मरणी चिंतनी ज्ञानदेव ॥

मूर्त सुकुमार शब्द सुकुमार

बोध हळुवार रुजे आत ॥

चांदणे शिंपण पाहून सुंदर

निवते अंतर आनंदाने ॥

कृपेचा निश्चळ डोह आरपार

तृषेला आवर नको वाटे ॥

वर्ष उलटली मन हे धाईना

नवाई मिटेना शब्दातील ॥

तयाच्या शब्दात आता मी निजतो

उठतो जगतो दिनरात ॥

नुठतो चित्तात मोक्षाचा विचार

जन्म वारंवार यावा इथे ॥

अवघे सरावे अवघे तुटावे

एकरूप व्हावे ज्ञानदेवे ॥

🌾🌾🌾

https://kavitesathikavita.blogspot.com .

☘☘☘☘ 🕉️ .